کواس گُشنت کہ بلوچی اے دمگ ءِ کوھن تریں زباناں گوں ھوار اِنت۔ تاریخ ءِ ردا ماں ایران ءَ ھخامنشی خاندان( 550–330 BCE) ءِ شاہ ءُ بادشاھانی زبان ھم بلوچی بیتگ ءُ آ بلوچ بیتگ اَنت۔ ھخامنشی عھد ءِ سِنگ ءُ ڈوکانی سرا ھما نبشتگیں نشان کہ دست کپتگ اَنت تہ بازیں کسے ءَ ھمے گپ دیم ءَ آؤرتگ کہ آ بلوچی ءَ نبشتہ کنگ بیتگ اَنت۔ بازیں تاریخ زانتانی ردا زرتشتانی کتاب ”اوستا” ھما زبان ءَ کہ نبشتہ کنگ بیتگ ، آ بلوچی ءِ کوھنیں دروشمیں۔ سید گُشیت بلوچی ءِ ھُنڈال گوں جھان ءِ بیگواھیں زبان پہلوی ءَ دوچار کپ اَنت۔ بیت کنت کہ پہلوی بلوچی ءِ کوھنیں دروشم بیتگ۔ چیاکہ زبان وھد ءُ جاورانی ردا وتی رنگ ءُ دروشم ءَ بدل کنت۔ دگہ بازیں انچیں تاریخی راستی اَنت ایرانی ملایانی پندل ءُ مکاریانی مجاں پہ زور اندیم کنگ بیتگ اَنت۔ آ نہ لوٹ اَنت کہ راستی دیم ءَ بئیت ءُ دُنیا بزانت کہ بلوچ کئے اِنت ءُ چونیں تاریخ ءُ زبانے ءِ واھُند اِنت۔ بلے دُشمن وا دُشمن اِنت آ نہ لوٹیت کہ من زندگ بہ باں، اے تاریخی راستيانی بیگواھی ءَ مئے جند ءِ کواس ءُ دانایانی نادلگوشی ءُ نپ دوستی ھم ھوار اِنت۔ 

بلوچ راج وتی زند ءَ اے گُلزمین ءَ پہ دِلجمی نہ نِشتگ۔ ہر عھد ءَ زوراکیانی آماچ بیتگ۔ عرباں وتی خدا ءِ نام ءَ اے زمین ءَ لُٹ ءُ پُل کُتگ۔ دگہ بازیں زوراکاں ھم پہ بلوچ ءِ جنگ ءُ کُشگ ءَ وتی دل نہ رنجینتگ۔ اینکہ بلوچ ءِ کُشت ءُ کوش بیتگ تاریخ ءَ چوشیں مثال کم رسیت۔ ساسانی بادشاہ نوشیروان(531 تا579) کہ عرب آئی ءَ دُنیا ءِ مستریں عادل ءُ گجر ”دادگر” ءِ نام ءِ دینت۔ بلے اے مرد پہ بلوچ ءَ نہ دادگرے بیتگ ءُ نہ عادلے۔ ایشی ءَ بلوچ ءِ کُشت ءُ کوش ءِ انچو حکم داتگ کہ بلوچ اے سر زمین ءَ پشت مہ کپیت ، اے گپ ءَ پہ وش منی ایرانی ساسانی عھد ءِ شاعر چوش درنگازیت کہ نوشیروان ءَ گوں بلوچ ءَ ھمے وڑ زُلم کُتگ کہ ”زن ءُ پیرمرد و کودک نماند”۔۔۔۔۔بلے نوشیران ءَ چہ خدا ءِ مھلوک عربانی ارش ترندتر بیتگ۔ عربی ارشاں گیش ءَ چہ گیش مئے زبان اثرمند بیتگ۔ عربی سِنچ ءَ ماں بلوچستان ءَ ملائی ردوم داتگ۔ اسلامی سنچ ءَ مئے زبان گیشتر پولنگ کُتگ ءُ گار کُتگ۔ ھمے عرب سنچ ءَ بلوچ ھمینکہ تاوان بار کُتگ کہ آخر بازیں بلوچ شاعراں بلوچ  عربی النسل گُشتگ اَنت ءُ رندا ھمے عربی سِنچ بیتگ کہ بلوچانی ملائیں حاکم نصیر خان نوری کہ بلوچ ھم ایشی ءَ مستریں عادل گُشنت رندا اے مرد ءَ ماں مکران ءَ ذگری ءُ نمازی ءِ نام ءِ سرا کُشت ءُ کوش کُتگ۔۔۔۔۔۔

تاریخ گُشیت کہ بلوچ چہ آرین نسل ءَ سیادی داریت۔ آئی ءِ زبان ھم آرین نسل ءِ زبانانی شاھے۔۔بلوچی بہ بیت یا براھوی، اے دوئیں لہجہانی بنکی دروشم ءُ ساخت ھم آرین دمگ ءِ نسل ءِ زبانانی دروشم ءَ جنت۔ بلوچ ءِ تب ءُ میئل ھم آرین نسل ءِ راجاں ھمگرنچ اِنت۔ بلے اے عربی ءِ اثر بیتگ کہ بلوچ تاریخ زانت ءَ وتی بنیاد بیھال کُتگ ءُ وت ءَ عرب گُشتگ ءُ وتی زبان ءَ چہ ھم شموشکار بیتگ۔۔تاریخ ءِ اے زُلم ءُ زوراکیانی سفر ءِ تھا مرچی بلوچ تاریخ ءِ گران تریں دور ءِ تھا گوزگ اِنت۔ یکے آ غلام اِنت ءُ دومی آئی ءِ زبان ھم چَرآئی ءِ دست ءَ روگ اِنت۔ اے ھم بیت کنت کہ اینکہ زُلم ءُ زوراکی ءَ ابئید ھم بلوچ ءَ وت ءَ ماں زمین ءَ برجاہ داشتگ کہ اے آئی ءِ زبان ءُ تاریخ ءِ شاھگانی بیتگ۔ اگاں ناں ادا بازیں راج ءُ زبان بیتگ اَنت کہ تاریخ ءِ دنز ءُ مجانی تھا بیگواہ بیتگ اَنت۔ منظور بسمل ءِ گُشگ ءِ ردا بلوچی اے دمگانی کوھن تریں زبان اِنت ءُ ”مادر لینگویج” ئے ءِ بستار ءَ داریت۔ ھمیش اِنت اینکہ زُلم ءُ زوراکی ءَ ابئید بلوچ ءِ رَکّگ ءِ سوب۔۔۔۔۔۔۔۔

بلے مرچی بلوچی تنگ دست اِنت، عھد ءِ پندلانی آماچ اِنت۔ زوراک بلوچ ءَ بیگواہ کنگ لوٹیت۔ زوراک ءَ مئے زبان ءِ بیگواہ کنگ ءِ پندل سازاِتگ۔ دری زبان مئے سرا پہ زور مُشگ بیتگ ۔ مئے زھگ ءَ را دری زبان ءَ تعلیم دیگ بیئگ اِنت۔ سید ھاشمی ءَ رند چوشیں کواس ھم نیست کہ پہ زبان ءَ بہ زریت۔ ادا دُراہ پہ نام کار کنگ ءَ اَنت۔ ھمینکہ کار کہ سید ءَ پہ دِل سِتکی کُتگ، اگاں دگہ یک انچیں دانشوری ودی بہ بیت تہ بلوچی وتی اصل رھبند ءَ گیپت کنت ءُ وتی منزل ءَ شوھاز اِت۔ مرچی بلوچی زبان دُشمن ءِ پندل ءُ دوست ءِ نادلگوشیانی آماچ اِنت۔ بلوچ زھگ ءَ را وتی ماتی زبان ءَ وانگ ءَ چہ زبھر کنگ بیتگ۔ بلوچ ءِ رھشون ءِ ھال ھم ایش اِنت کہ آ وتی پمفلٹ ءُ سیاھگاں ھم دُشمن ءِ زبان ءَ شِنگ کنت۔ بلوچ ھالکار پہ بے سمائی اردو ءَ نبشتہ کنت۔ آ بلوچی نبشتہ کنگ ھم نہ زانت۔ راجدوست ءَ سوشل کُڈک ءُ نیٹ ورک بوتکگاں، آ ھم دُشمن ءِ زبان ءَ۔۔۔۔۔۔اکبر خان ءَ لوٹ اِت کہ بلوچ زھگ ءَ بلوچی وانینگ بہ بیت۔ بلے اکبرخان ءِ اے کار ھم درمیانہ طبقہ ءِ پندلانی ھرجان بوت۔ درمیانہ طبقہ ءَ وش نہ اَت کہ بلوچ زھگ بلوچی ءَ بہ وانیت۔ پمیشا آھاں بھانگ درگیپت کہ اکبر خان ءِ رواج داتگیں بلوچی بگٹی ءُ مری لہجہ ءَ اِنت۔ اے واجہاں اردو دوست بوت۔چیاکہ ایشاں ھمے کار بُرز ءَ گُشگ بیتگ اَت۔ ایشاں دیست بلوچ زھگ اگاں بلوچی بوانیت تہ وتی تاریخی راستیاں سرپد بیت۔ وتی غلامی ءَ ماریت۔۔ پمیشا درمیانہ طبقہ ءِ لیڈر اکبرخان ءِ دست ءَ گیپتگیں کار ءِ دیم ءَ میلانک بیت اَنت ءُ اے ھما اَنت تہ انگت بلوچ راجی جُنز ءِ دیم ءَ میلانک اَنت ءُ ریاستی ادارھانی کار ءَ دیم ءَ برگ ءَ اَنت۔۔